Tuesday, January 26, 2010

පතිනියකගේ ශෝකාලාපය . . . !



තුන්කාලේ කලිසම් - අත්,කර නැති ටී ෂර්ට්
නිල් කලු ඩෙනිම් ජීන්ස් - මල් මල් ගවුම් පොඩි
කිචි බිචි ගා සිනා සෙන - මිතුරු මිතුරියන් කැලම
පාඩමට බාදා දෙන - නිබඳ තුරුලේ නිදන
චූටි මල්ලී යි නම් ලැබූ - හුරතල් පූස් පැටියාද
අත්හලෙමි සියළු දේ - තුටින් නොව පුංචි දුකකින්
ආදරේ නාමයෙන් - මේවා නම් මොනවාද . . .?

කුස රජු මුසපත් කල - රන් රුවක් මෙන් දිදුල
පබාවතී සේ සොඳුරු - නාරි දේහී රූ සපුව
ඉඟටියෙන් පහලට දිවූ - දිගැටි ඝන නීල වරලස
හිසේ සිට දෙපතුලට - වොයිල් සාරියෙන් පොරවා
රන් රූ වසා ගතිමි - කිසිවෙකුට නොපෙනෙන්ට
ප්‍රේමයේ නාමයෙන් - කැප කිරීම් කම් නැතේ

අම්ම අප්ප කෙසේ වත් - මා ගතම කොටස් වූ
නංගියයි මල්ලියයි - කෙසේ අතහැර යම්ද . .

සුදීරා නම පුදා - ෆරීනා නම ලදිමි
බුදු දහම අතැර විත් - ඉස්ලාම් භක්තික වීමි
ප්‍රේමයේ නාමයෙන් - ජීවිතය වුව පුදමි
ප්‍රේමයෙන් මන - රංජිත වේ නංදිත වේ

අහෝ එවන් විසල් ප්‍රේමය - දියව ගිය ඉක්මන
මිරිඟුවක්ද මා මේ - සොයා ආ පෙම් නදිය

නෑදෑ හිතවතුන්ට - පල්ලියට උජාරුවට
පිරිමිකම පෙන්නන්න - දරු රොත්ත ලබනු වස්
දරු වදන යන්ත්‍රයක් - වුනා පමනක් ද මා . . . !!

උදේ ඉඳන් රෑ වන තුරු - දරු නලවන, කෑම පිසින
ගේ අමදින, හති නාරින - වහලියක්ද පතිනියක්ද
අල්ලා දෙවියනේ අනේ - වටහා දෙනු මැන මේ මට . . . !!

දස මසක් කුස දරා - විලිරුදා ලද වැදූ
ඇඟේ ලේ කිරිකර - පොවා සනහා ලැබූ
හිමිගෙන් කිසිදා නොලත් - සෙනේ වදනින් තැවූ
දරු කැලට හිමිකමක් - අහිමි කල නීතිය ශාරියා
කොතරම් මානුශිකද - අනේ මට කියා දෙන්න
නබි නායක තුමානනේ - ආ . . මේන් . . . !

Monday, January 25, 2010

හත් වලාමේ වෙච්චි දේට මක් කොරන්නද . . . . . !!



මාර වැඩේ . . . අපේ ගෙදර උන්දැට හරිම අකරතැබ්බයක් වෙලානේ . . .

"පුල්ලි ගොනා ගෙට පැනලා කඹේ කඩා ගෙන . .
ගෙදර උන්දැ කොන්ඩෙ බඳින හවරියා කාලා . ..
කොන්ඩෙ බඳින්නට විදිහක් නැතෙයි කියාලා . . .
මටයි දෝස කියන්නේ මං මක් කොරන්නද . ..
හත් වලාමේ වෙච්චි දේට මක් කොරන්නද . . "

නෑ නෑ මෙහෙම සීන් එකක් නෙමෙයි දෙයියනේ . . . උන්දැලගේ ගෙදර කොහෙද පුල්ලි ගොනෙක් . . .

උන්දැ නිවාඩුවට උන්දැලගේ මහ ගෙදර ගිය ගමන් නතර වුනානේ ටික කාලෙකට මෙහේ රැකියා තත්වේ හොඳ නෑ කියලා ටිකක් හොඳ වෙනකම් කියලා . . . උන්දැලගේ ගෙදර තියෙන්නේ මහ පාර අයිනේමයි . . ගෙදර ඉඳන් පාරට එන්න පඩි හය හතක් බහින්න ඕන . . . අපේ කොල්ලගේ තියෙනවා පුදුම ඉල්ලීමක් . . . අම්මා හරි . . . ආත්තම්මා හරි . . ලොකු අත්තා හරි ගෙයින් එලියට යනවා නම් එයාවත් එකක්ගෙන යන්න ඕන . . . එයාට පේන්න ගෙයින් එලියට බැහැලා ගියොත් ඉතින් සොරිම තමයිලු . .

අපේ උන්දැට ලඟ පාත කඩේට යන්න ඕන වෙලා කොල්ලාට හොරෙන් ගෙයින් එලියට බැහැලා යන්න හදද්දී කොල්ල එනවද කියලා පස්ස බල බල යන්න ගිහින් පඩිපෙලේ ලිස්සල වැටිලා කකුල දෙපොලක් තුවාල වෙලා . . . හරිම අමාරුවෙන් තමයි මේ දවස්වල ඉන්නේ . . .

"නිදා ගන්නකොට හැරෙන්න බෑ හලෝ හරිම අමාරුයි" කිව්වහම

"ඉතිං ඔච්චර අමාරුවෙන් හැරෙන්නේ මොකෝ . . හැරෙන්නේ නැතුව ඉන්නකෝ ඩාලිං . . . . " කියලා මම කිව්වයි කියලා මාව අනුභව කරන්න තරම් කේන්තියෙන් තමයි උන්දැ ඉන්නේ මේ දවස් වල . ..

(නිවාඩුවට ගෙදර ගියාම අපේ අම්මගේ ලෙඩ ගැන කියද්දී "හුස්ම ගන්න අමාරුයි බං . .හුස්ම ගන්නකොට පපුව රිදෙනවා . . " කියලා කියද්දී . . . "අනේ ඉතිං ඔච්චර අමාරුනම් හුස්ම නොගෙන ඉන්නකෝ . ." කිව්වහම අම්මගෙන් අහගන්න ලැබෙන්නේ මෙන්න මේවායි . . .!@#$%^&%^%$@ හික් හික් . . )

ඒ අස්සේ උන්දැ නොන්ඩි ගහනකොට අපේ කොල්ලත් බොරුවට නොන්ඩි ගහනවලු කින්ඩියට . . .(ඒක නම් කොල්ලට අප්පච්චිගේ ජාන වලින් ලැබුනු තෑග්ගක්ද කොහෙද . . ) හික් හික් . . . ඒක දැක්කාම උන්දැට තවත් කේන්ති යනවා ඇති . . "මූත් මහ එකා වගේමයි . . . කාටහරි කරදරයක් වුනත් ඒකත් විහිලුවටමයි ගනන් ගන්නේ" කියලා . . . ඇයි හත් දෙයියනේ මුලු ඇඟම පිච්චිලත් . . .ඉවසගන්න බැරි අමාරුවෙන් වුනත් මම හිටියෙත් හිනා වෙවීනේ . . එහෙම එකේ මේ පොඩි තුවාලෙකට දුක් වෙන්නේ අහවල් කාරියකටද . . .

තව සතියකින් උන්දැගේ මල්ලිගේ වෙඩිම ත් තියෙන නිසා "හෆොයි දැන් වෙඩිම දවසට සාරි අඳින්නේ කොහොමද . . සපත්තු දාන්නේ කොහොමද . . " කිය කියා නහයෙන් අඬමින් වගපාලි කියන කොට මට මතක් වුනේම ඉස්සර කාලේ මම හරිම ආසාවෙන් කියවපු . . දැන් නම් ඒ ලියපු කෙනාගේ නම ඇහෙනකොටත් යකා නගින . . . පත්තරේක කොලමක තිබුනු ලිපියක් . . .

. . . . . . . . . . . . . . . . . . . . . . . . . . . . .

එක පොරක් ගේ හොඳම යාලුවා කසාද බඳින්න ලෑස්ති වුනාලු . . . මේ පොරත් ඉතිං බැහැලා සප් එක දුන්නලු යාලුවගේ වෙඩිමට . . .

ඒ අතරේ වෙඩිම දවසට පොර අඳින ඇඳුම් . . . දාන සපත්තු . . එහෙම ගැන සෑහෙන්න හිතලා මතලා . . වියදම් කරලා ඒවත් ලෑස්ති කර ගත්තලු . . . ඇයි ඉතිං හොඳම යාලුවගේ වෙඩිම නිසා පොරත් ඉන්න එපයි ටොයියා වගේ . . . වෙඩිම දවසේ මොන මොනා වෙයිද කියලා කවුද දන්නේ . . . බැරි වෙලාවත් යාලුවා ලස්සන කෙල්ලෝ ටිකකට එහෙම ඉන්වයිට් කරලනම් . . . .. . . නේ . . ???

පොරගේ කරුමෙට වෙඩින් එකට සතියක් විතර තියෙද්දී කකුලේ තුවාලයක් වෙලා . . .

අනේ පොර ඉතිං හරිම කනගාටුවෙන්ලු ඉන්නේ . . . "දැන් ඉතිං වෙඩින් එක දවසට කොහොමද සපත්තු දාන්නේ" . . "හෆොයි මට වෙච්චි අපරාදයක් . . " කිය කියා මිනිහ කල්පනා කරමින් ඉන්නවලු . . .

මොන දේ කලත් පොරගේ හිතේ තියෙන්නෙම කකුලේ තුවාලෙයි . . වෙඩින් එකයි ගැනමලු . . . කෑවත් . . බිව්වත් . . වැඩක් පලක් කලත් . . මොන මගුලක් කලත් . . . කකුලේ තුවාලෙයි . . . වෙඩින් එකයි මිනිහගේ හිතෙන් අහක් වෙන්නේම නැතිලු . ..

වෙඩින් එකට දවස් දෙක තුනකට කලින් පොරට පොඩි ගමනක් යන්න වෙලා බස් එකකට නැග්ගලු . . . මිනිහ ඉඳලා තියෙනෙන දොර ලඟමලු . .. ඔහොම යන අතරේ මැද්දේ හිටපු අඩි උස සපත්තු දාපු නෝනා කෙනෙක් කඩාගෙන බිඳගෙන එනවලු ඊලඟ හෝල්ට් එකේදී බහින්න කියලා . . .

මිනිහට තේරුනාලු මේ නෝනා එන විදිහට නම් මගේ කකුල පාගනවා ෂුවර් ම තමයි කියලා . . . හිතලා නෝනා ලඟට එනකොටම ටිකක් හයියෙන් කිව්වලු . ..

"හා හා කකුල නම් පාගන්න එපා . . . කකුලේ වෙඩින් එකක්" කියලා . . .

පොරට කියන්න ඕන වෙලා තිබිලා තියෙන්නේ "කකුල නම් පාගන්න එපා කකුලේ තුවාලයක් . . ඒක පෑරුනොත් වෙඩින් එකට යන්න බැරි වෙයි" කියලලු . . නමුත් හදිස්සියට පොරට කියවිලා තියෙනෙන අර විදිහටලු . ..

. . . . . . . . . . . . . . . . . . . . .. . .. . . . . . .

ඒකයි මම කිව්වේ "මාර වැඩේ, අපේ ගෙදර උන්දැට හරිම අකරතැබ්බයක් වෙලානේ " කියලා . . අපේ ගෙදර උන්දැටත් කකුලේ වෙඩින් එකක් . . . හික් හික් හික්

ෆොටෝ එක ගත්තේ මෙන්න මෙතනින් . ..

Tuesday, January 19, 2010

පාර්ටි . . . . පාර්ටි . . . පාර්ටි . . . !!



"චමල් අද මොකෝ කරන්නේ . . . කොහෙද සෙට් වෙන්නේ. . ?"

"දමිත්ල ගේ ගෙදරද . . උඹල ගේ ගෙදරද . . අපේ ගෙදර වුනත් පුලුවන් . . "

"ඉස්සර අපි හැමදාම දමිත්ලගේ ගෙදරම සෙට් වුනානේ බන් . . පවුනේ උන්ටම වද දෙන්නේ . . . අපේ ගෙදර සෙට් වෙමු . . ."

"අහ් නෑ එහෙමට කරදරයක් නෑ අපිට . . අපේ ගෙදර සෙට් වෙමු . . "

"අවුලක් නෑ දමිත් මල්ලී . . උඹලගේ ඔයෙසිස් වතුර බෝතලේ අරන් වරෙන් ඒ ඇති . . වතුර තියෙනවනම් හලල හරි ගෙනෙන් . . ඩිරාහ්ම්ස් අටයිනේ බං . . . ගිටාර් බිටාර් තිබුනත් අපේ ඩ්‍රම් එක නැතුව පාර්ටියෙන් වැඩක් තියෙනවාද . . . හෙ හෙ හෙ හේ "

"තුෂාර උඹේ ලඟ මොනාද තියෙන්නේ බොන්න . . මගේ ලඟ ජැක් ඩැනියෙල් එකක් තියෙනවා . . . බැලැක් ලේබල් එකකුත් තියෙනවා . .. "

"අහ් මම RAK බා කුඩා වලින් ගෙනාපු රෙඩ් වයින් ලීටර් 3නේ පැක් එකක් තියෙනවා . . "

"අපේ කාන්තාවෝ වැඩි හරියක් බොන්නේ නෑ නේ බං . . මගේ ෆ්‍රිඩ්ජ් ඊක ස්මිනෝෆ් වගයකුත් ඇති . . . . එයාල බොනවනම් ඒවා අරගෙන බොන්න කියමු . . . මංජුලා හැමදාම චංඩියා වගේ මට ටිකිලා එකක් ඕන කිව්වට බොන එකක්යැ. . . ටිකිලා බාගයකුත් තියෙනවා ෆ්‍රිඩ්ජ් එකේම . . "

"සංජීවත් කිව්වා ඌ ලඟත් බැලන්ටයින් එකක් තියෙනවා කියලා . . ඒකත් අරන් ඌටයි චම්පිටයි කෙල්ලෝ දෙන්නට යිත් එන්න කියමු . . . "

"ඔව් මචං චමල්, චම්පිට කිව්ව නම් එග් පුඩිමක් ඒ කිව්වේ මේ වපලට්ටමකුත් හදාගෙන එයි නේද . .. "

"ඔව් ඔව් චම්පිට ඔය අනං මනං වැඩිය හදන්න දන්නේ නෑ නේ . . . මම චුට්ටිට (චුට්ටි = චමීරා . . . චුට්ටි කිව්වට චුට්ටිම නැත . . .හික් හික්) කියන්නම් ෆ්‍රයිඩ් රයිස් එකක් හදන්න කියලා . . . "

"ආ ඒක හොඳයි . . . මම ගයාත්‍රිට කියන්නම් චිකන් කරි එකක් හදන්න කියලා . . "

"ඔව් ඔව් ගයාගේ චිකන් කරි එක රසයිනේ . . හරි දමිත් උඹ එහෙනම් මාලකටයි . . ලිඳුලි ටයි ත් කියපන් අල හොද්දක් හදන්න කියලා . . පොඩි උන්ට කන්න දෙන්න පුළුවනේ එතකොට . . . නදීෂාගේ බෝංචි කරි එක රසයි නේ . . . මම එයාට කියන්නම් බෝංචි කරි එකක් හදන්න කියලා .. ""

"සුමින්ද ටයි මංජුලාටයි එන්න කිව්වොත් උන්දෙන්නා කට්ලට් හදාගෙන එයි නේද . . ."

"මංජුලාගේ කට්ලට් කාලා ඉස්පිරිතාලේ ඉන්න වෙයිද දන්නේ නෑ. . හික් හික් .. කමක් නෑ උන් අර කෑම ගන්න අක්කට කියලා හරි හදාගෙන එන්නේ නැතැයි . . ."

"බුද්ධිකයි කුමුදුනිත් මොනා හරි හදාගෙන එයි . . ."

"ජනක් ටයි තක්ෂිලාටයි ත් එන්න කියමු නේද . . . "

"ජනක් ගේ එග්සෑම් නිසා උන් දෙන්න එයිද දන්නෙ නෑ . . ඒත් කොඉ එකටත් උන්ටත් එන්න කියමු . . "

"RAK තුෂාරලටත් එන්න කියනවාද . . "

"උන් කොහෙ එන්නද . . . උන්ගේ ගෙදරත් හැම බ්‍රහස්පතින්දාම පාර්ටිනේ බං . . . අනික මේ වීකෙන්ඩ් එකේ රුවනුයි නිසංසලායිත් එහේ එනවා කිව්වා . . "

"චෙෆ් ලංකා එකෙන් මොනා හරි ගෙන්නමුද . . ?"

"අපෝ එපා . . ඒකේ ඒවා කන්න බෑ බං . . මාර විදිහටනේ උන් මිරිස් දාන්නේ . . . "

"එහෙනම් අරලිය එකෙන් බැදපු මාළු ටිකක් ගෙන්න ගමු . . . බයිට් එකට . . ."

"අහ් . . එහෙනම් ලළන්තට කියම් ඒ ටික අරගෙන එන්න කියල. . . එතකොට අරලිය එකේ නංගිවත් බලල එන්න බැරියයි ඒ ගමන්ම. . . "

"ඇයි PIGI ට පුළුවන්නේ ඕන නම් තව චිකන් එකකුත් චූටි කෑලිවලට කපලා ගම්මිරිස් ලුනු අතගාලා තියලා ඩීප් ෆ්‍රයි කරගෙන අරන් එන්න . . . මොකෝ කියන්නේ තුෂාර .. . "

"හරි හරි මම බදින්නම් . .. "

"රුචිරට එන්න කියන්නේ නැද්ද සුබා. . ."

"චුරු චුරුට මාව දැක්කම තම්බිට ඌරු මාලු දැක්ක වගේ නේ බං . .. කමක් නෑ මල අතේ තියාගෙන බුම්මගෙන හරි ඉන්නෙ නැතැයි . . ඌටත් එන්න කියමු . . "

. . . . . .. . . . . .. . .. . . .. . . .. . ..

මේ කාලයකට පෙර (ඈත කාලයේ නෙමෙයි . . බොහෝම මෑත කාලයේ පවා . . ) හැම බ්‍රහස්පතින්දා දවසකම අපේ මිතුරු සමාගමේ සුපුරුදු සංවාදයක් . . . ඉරිදා ඉඳන් බ්‍රහස්පතින්දා වෙනකම් මැෂින් වගේ එක දිගට වැඩ කරලා සති අන්තේ (අපේ සති අන්ත නිවාඩුව සිකුරාදා සහ සෙනසුරාදා වේ . . ) වෙනකම් අපි හැමෝම බලං ඉන්නේ කාන්තාරයක ගමන් කරනවුන් ටිකක් ක්ෂේමභූමියක් දකින කම් ඉන්නවා වැනි නොයිවසිල්ලකින් . ..

බොහෝ විට රෑ අටට නමයට පටන් ගන්නා මේ පාර්ටි ඉවර වෙන්නේ පහුවදා උදේ හතරට නැති නම් පහට විතර . . . මට තාම මතකයි අපි විවාහ වුනු මුල්කාලයේ බ්‍රහස්පතින්දාක දමිත්ලගේ ගෙදර තිබුනු ඔයවගේ පාර්ටියක් ඉවරවෙලා සිකුරාදා උදේ පහට විතර අපේ ගෙදර යන ගමන් නදීෂා මට කියනවා . . . " මම නම් කවදාවත් හිතුවේ නෑ මේ වගේ නිශාචර ජීවිතයක් ගතකරන්න වෙයි කියලා . . . "

ඒකට පිලිතුරු වශයෙන් "නිශාචරයෙක්ව බැන්දනම් නිශාචර ජීවිතයක් ගත කරනන් වෙනවා" කියලා මම කිව්වද කියලා නම් මට මතක නෑ . . සමහර විට හොඳ ම සිහියෙන් නෙමෙයිද දන්නෙ නෑ ඒ වෙලාවේ හිටියේ . . හික් හික් . .. .

හොඳම වැඩේ කියනනේ අපේ සෙට් එකේ හිටියේ බෙබාලා නෙමෙයි . . . සෙට් වෙලා . . .රෑ එලි වෙනකම් සිංදු කියලා . . . නැත්නම් එකාට එකා මඩ ගහගෙන . . එහෙමත් නැත්නම් අපේ පරන කතා හෙවත් පැරණි රසාංග කිය කියා සතුටු වෙන්න ඕනෑවට බිව්වා මිසක් . . . .කන සාක්කුවේ දාගන්න ගානට බොන වුන් නම් අපේ සෙට් එකේ එකෙක් වත් නෑ . . . දමිතුයි මාලකයි ලළන්තයි නම් කොහොමටවත් බොන්නේ නෑ . . . (අපරාදෙ උන්ගේ ජීවිත . . හික් හික් . . )

මගෙයි දමිත්ගෙයි සංජීවගෙයි ගිටාර් තිබුනා වුනාට ගිටාර් ගහන්න පුලුවන් එකෙක් හිටියේ සංජීව විතරයි . . . චමල් හැමදාම කැලැරන්ස්ගේ සිංදු ඕන එකක් මම කියන්නම් කිව්වට . . . කියන්න ගත්තාම බොරුවාට කුටු කුටු ගගා ඉන්නවා . . .දමිතුයි මායි තමයි ඉතිං ගොඩදාලා දෙන්න ඕන . . .

මට නම් ඉතිං සිංදු ගොඩාක් මතක තියෙනවා වුනාට කියන්න නම් බෑ . . . ඒ වුනාට ඉතිං අර ගස් නැති රටේ එඬරු ගසුත් ගස් වගේ . . මේ මගේ ගීත ගායන හැකියාවටත් (වසරේ විහිලුව . . හික් හික් . . ). . . (අසන්නන්ට දෙයියන්ගේම පිහිටයි. . ) ඒ වගේ වෙලාවට තැනක් ලැබෙනවා . ..

ඒ අස්සේ මට මතක් වෙන්නේ රුවන්වැල්ලේ නැන්දලාගේ කලාඋළෙල නිමා වෙලා අපි කෙල්ලෝ කොල්ලෝ කට්ටිය රෑ වෙන කම් සිංදු කියපු දවසේ කලායතනේ සංගීතය උගන්වන කරවනැල්ලේ "ජගත් සර්" කියපු දෙයක් . . .

"මල්ලී ඔයාට සිංදු ගොඩක් කට පාඩම් ඒත් ඔයාට ගායනා කරන්න බෑ . . . සිංදු කට පාඩම් එකයි ගායනා කිරීමයි කියන්නේ දෙකක් . . ."

මම ඉතිං නදීෂාට නිතරම කියනවා අමරසිරි පීරිස් සංගීත ක්ෂේත්‍රයේ කාලයක් තිස්සේ ඉඳලා වයසට ගියාම නේ ගායකයෙන් විදියට එලිපහලියට ආවේ . .ඒ වගේ මාත් වයසට ගිහින් හරි නියමිත පරිදි සංගීතය හරියට හදාරනවා කියලා . ..

රෑ ඉඳන් පාන්දර වෙනකම් සිංදු කියන්න වුනාම අපි මුහුන දෙන ලොකුම ප්‍රශ්නේ තමයි සිංදු මතක නැති කම . . . පොඩි පාවෙන වගේ ගතියත් එක්ක සමහර වෙලාවට මතක තියෙන සිංදුත් මතක තියෙන්නේ මැද්දෙන් පොඩි කෑල්ලක් . . . "අර අර අහවලා කියන්නේ බං . . අර . . මෙන්න මෙහෙම කෑල්ලක් තියෙන්නෙ . . " කියලා සමහර වෙලාවට සිංදු දහයක් විතර කියන කාලයක් අපතේ හරිනවා එක සිංදුවක් මතක් කරන්න . . .

මේකට පිලියමක් කල්පනා කරපු මම කලේ . . . . මම ඒ කාලේ ටයිප් කරන්න දන්න කපුටා ඩොට් කොම් ෆොන්ට් එකෙන් අපේ ප්‍රියතම ගීත වල මුල් කොටස විතරක් අපි ඒවා කැටගරයිස් කරලා කියන විදිහටම ටයිප් කරපු එක . . .

ඒ කිව්වේ අපි සිංදු කියන්න ගත්දී මුලින්ම ස්ලෝ ඒවා . . පස්සේ චිත්‍රපටිවල ඒවා . . . පස්සේ බයිලා . . වෙලාවක නාට්‍ය ගීත . . . මගුල් ගෙවල් වල දාන ඒවා . . අම්මට තාත්තට කියාන ඒවා . . . ඔන්න ඔය විදිහට තමයි අපි කැටගරයිස් කලේ . . .

මේ ලඟදි මට ගෙදර අස් කරද්ද්දී ඒ ටයිප් කරපු ලිස්ට් එක හම්බුනා . . . ඉතිං මම හිතුවා ඔයාලටත් මේක ප්‍රයෝජනවත් වෙයි කියලා පාර්ටි දාන වෙලාවක . . .

අනික මේ දවස් වල මම ලබන සතියේ නිවාඩු ආවහම පාර්ටියක් දාමු කියලා කතා වෙවී ඉන්න වෙලාවේ නිසා මේක මටත් ගොඩාක් ප්‍රයෝජනවත් වෙන බව නම් මට විශ්වාසයි . . .

ගොඩාක් වෙලාවට වික්ටර්ගේ සිංදුයි නංදාගේ සිංදුයි ගොඩක් දමිත්ටයි මටයි මතක නිසා වික්ටර්ගේ,නංදාගේ ගීත වලින් නිතර නෑසෙන ඒවා විතරයි මේකේ ඇත්තේ . . .

මේක බලල මට මිස් වුනා කියලා හිතෙන ගීත කමෙන්ට් එකක් විදිහට දාන්න කියලා මම ඉල්ලීමකුත් කරන්න කැමතියි ඔයාලා හැමෝගෙන්ම . . . . .









මේ කස්ටිය මේකේ පොඩි පොඩි ටයිපින් මිස්ටෑක් . . වචන වැරදීම් එහෙම තියෙනවා . . .ඒවා ගැන වැඩිය හිතන්න එපා හොඳේ . . . හික්ස්

Monday, January 18, 2010

මා කාටද මේක කියන්නේ . .. මා . . . කාටද මේක කියන්නේ . .. . . . !



මම බොහෝ කාලයක සිට සිතමින් සිටියා මගේ සිත් ගත් පැරණි රසාංග (පැරණි ගී) කීපයක් ඔබ සමඟ බෙදා හදා ගත යුතුයි කියා . . .

විශේෂයෙන්ම නිවාඩුවක දී නුගේගොඩ සුපර් මාර්කට් හි පහත මාලයේ ඇති කඩයකින් මා මිලදී ගත් සංයුත්ත තැටියක් මට ඒ අදහසට පොහොර දමනු ලැබුවා . . .එහි මිල ඉතා පුන්චියි නමුත් ලබාදෙන රසය කියා නිමා කල නොහැකියි . . .

ආර් මුත්තුසාමි අපේ සංගීත ක්ෂේත්‍රයේ නොමැකෙන මතක සටහන් තැබූ සංගීතඥයෙක් බව ඔහුගේ ගී . . . ඔහු විසින් නිර්මිත තනු සහිත ගී . . . රසවිඳ ඇති ඕනෑම අයෙක් විසින් පිලිගනු ලබන බව මගේ වැටහීමයි . . .

මේ සංයුත්ත තැටිය ඔහු විසින් නිර්මිත ඔහුගේ ගී ඔහුගේ පුත් මෝහන් රාජ් විසින් සමහර ගී සඳහා නව ගීයක ගායිකාවන් යොදා නැවත පටිගත කල අපූරු තැටියක් . . .

මේ බ්ලොග් අවකාශේ නංගිලා මල්ලිලා බොහෝ දෙනෙක් නම් මේ ගී අසා ඇතිදැයි කියා මට නම් සැක සහිතයි . . . අසා බලන්න මේ ගී ඔබව කොතරම් ආනන්දයට පත්කරනවාදැයි . . .

. . . . . . . . . . . . . . . . . . . . . . . .

මම මගේ දෙනෙත වසා ගතිමි . . . දෙවියනේ . . . ඔබ ඇවිදින් මා අසලම සිටගෙන . . . මම මගේ දෑතින්ම දෙසවන වසා ගතිමි . . ඔබේ මියුරු හඬ මා වටේටම රැව් පිලිරැව් දෙන්නේ මන්ද මේ . . . දෙවියනේ . . මේ මදනලේ දැවටීගෙන එන සුලඟට ඔබේ සුවඳ කොහෙන් ලැබුනාද . . . මේ හැමදේම මගේ කැඩී ගිය පෙම් කැදැල්ලේ මතක සටහන් මට යලි යලි සිහිපත්කරවන්නේ මන්ද . . . අනේ මා මේවා කාටද කියන්නේ . . . දෙවියන්ගේ නාමයෙන් කියන්න මට ඇයි ඔබ පිටවෙද්දී ඔබට මේ සියළුම දේවලුත් රැගෙන යන්න අමතක වුනේ . ..

මගේ දෑසම පියවී යන්නේ . .

මගේ දෑසම පියවී යන්නේ . .
ඔබේ රූපය මයි දිස්වන්නේ . . .
මා කාටද මේක කියන්නේ . ..
මා කාටද මේක කියන්නේ . . .

මා සෑදුව කූඩුව කැඩුනා
මල් මාලය පරවී වැටුනා
සෝ සුසුම් හෙලා දෑසම නොබලා
කාටද මේක කියන්නේ . ..
මා කාටද මේක කියන්නේ . . .

අද ගං තලයේ දිය සිඳුනා
වැලි කතරක ඒ දිය ගිලුනා
මග මරු වැදුනා පහනද නිවුනා
කාටද මේක කියන්නේ . ..
මා කාටද මේක කියන්නේ . . .

මගේ මතකයේ හැටියට නම් මේ ගීතය ගයන්නේ සූරියකුමාර් මුත්තලගේ . .නමුත් මියුරුගී අඩවියේ ඇති ගීතය ගායනා කරනෙන මුත්තුසාමි මාස්ටර් විසින් . . .

මේ මියුරු ගීතය මෙතනින් අහන්න . . .

. . . . . . . . .. . . . . . .

මේ මංදාකිනිය පුරාවට පීදිලා තියෙන දාස් ගනන් තරු නිවි නිවී දිලෙමින් සිනා වෙන්නේ අප සමඟ නොවේද . . .?? මේ මාධුර්‍‍යය පිරුනු රාත්‍රිය අප වෙනුවෙන්ම සුසැදි ප්‍රේම නදියක් ලෙස ඔබට නිකමට වත් සිතෙන්නේ නැද්ද . . . එන්න ප්‍රේමිය . . මේ සුදු හංස රෑන් පෙම් රැඟුම් රඟන ප්‍රේම නදියේ ඇයි අපි තවත් පිහිනමින් සතුටු වෙන්න පමා වෙන්නේ . ..

මධුර යාමේ. . .

මධුර යාමේ සුව දෙසාමේ . . //
සිනහ වීලා එන්න රෑ මේ . .
ප්‍රේම නදියේ . . පීන පීනා
එන්න රෑ මේ . . ඕ . .
තරු සිනා සේ . . දෙනෙත පොපියයි . . //
මසිත පිබිදී සතුට රජවෙයි . .
ප්‍රේම නදියේ . . පීන පීනා
එන්න රෑ මේ . . ඕ . .
ඕ ඔ ඕ . . ඕ ඔ ඕ
හා . හ . හා . . . හා . හ . හා . . .

සුසුදු හංසයෝ විලෙහි සරතී
රසය ඇති තැන් කොහෙද සොයතී . . . //
දෑත විහිදා එන්න අඳුරේ. .
උන්ව අල්ලා ගන්න මිහිරේ . .
අතට අතදී . . .හිතට හිත දී. . //
රැල්ල විලසී එන්න පෙරලී . .
ප්‍රේම අන්දියේ පීන පීනා එන්න රෑ මේ . .
ඕ ඔ ඕ . . ඕ ඔ ඕ
හා . හ . හා . . . හා . හ . හා . . .

"සිතක මහිම" චිත්‍රපටියට ආර්. මුත්තුසාමි සමඟ සුජාතා අත්තනායක ගායනා කල මේ ගීතය මෙතනින් අසන්න පුලුවන් . . .

. . . . . . . . . . . . . . . . . . .

අනේ සුළං රැල්ල . . . ඔබ රැගෙන ආ ඔහුගේ සුවඳ මට නොදී ඔබ පලා යන්න නම් සිතනන්වත් එපා . . . ඔහු වෙනුවෙන් මගේ සිතේ උපන් සිතුවිලි මේ ගං දියේ නැගෙන සුලි මෙන් එක තැනම කැරකි කැරකී එක තැනකටම රොක් වෙනවාක් මෙන් ඔහු වටා පමනයි . . ඔහු පමනයි . . . නෑ මට වෙන ලොවක් ඔහු හැර . . . ඔහු එපමනකටම මගේ ලෝකය ආක්‍රමනය කල සැටි කොතරම් අපූරුද . . . ??? ඉතිං කෝ ඒ සොඳුරු කුමන්ත්‍රනකාරයා . . . ඔහුගේ පමාවෙන් මගේ සිත වේදනාවෙන් සැලෙන හැටි . . .

ආදරේ මන්දිරේ

ආදරේ මන්දිරේ
සඳළුතල එලිවෙලා
මීවිතේ . . මී පිරී
පිටාරය එයි ගලා . .. //

සුවඳ අරගෙන ඔබේ . .
සුලඟ මා වෙත එබේ . . //
සුහද ඔබ කිම පමා . .
සුසුම් රැල් යයි හමා . . . //

ගඟක බිහිවෙන සුලී
වැනිය හද සිතුවිලී . . //
නයන සනහන පුරා . .
කොහෙද මගේ පෙම්බරා . . . //

"ඔක්කොම හරි" චිත්‍රපටයෙන් වෙනුවෙන් මේ ගීතය ගායනා කරන්නේ සුජාතා අත්තනායක . . . මේ ගීතය මෙන්න මෙතනින් අසන්න පුලුවන් . . .

. . . . .. . . . .. . . .. . .

දෙවියනේ . . . ඔබේ කැදැල්ල උනුසුම පිරුනු සුව යහනාවක් කියා මා රැවටුන තරමක් . . . අපේ ප්‍රේමය මගේ හද සුවපත් කරන ඔසුවක් නොව වේදනාවෙන් හදවත පුලුස්සන රත්වූ යවටයක් බව වැටහෙන විට මා කෙතරම් පමා වීද . . . විවාහයට පෙර ඔබෙන් ලද මුදු වදන් වෙනුවට අද පිටවෙන මේ ගිනිදළු වන් රුදුරු වදන් මා සිතේ ඇතිකරන සංකාව මා කෙසේ විඳදරා ගන්නද . . .

පරම රමණී

පරම රමණී අපේ ආලේ
සදාකල් දුකට වී මූලේ . .
සමාජේ රුදුරු කාන්තාරේ . .
කොහේ අපි යනුද නොම තේරේ . .
පරම රමණී . . .

කිමද වෙන්නේ අනේ නොදැනේ . .
මෙයින් මතුදා . . ..
විදුලි හඬ ජලයකැයි සිතලා
මිරිඟුවකි ආවේ මා සොයලා
එයින් නෙත කඳුලී පිරිලා

ආ .. අ . . ආ . ..

විවාහේ මධුර රස ලොබ වී. .
මුලාවේ වැටුනේ අඳුරේ හී
ලැබෙයිදෝ . . මිහිර ප්‍රේමේ මේ
සදා දුක දෙයිද නොදැනේවී . .
සිතේ සැක ඒවි දැන් මතුවී . .

"නලඟන" චිත්‍රපටියට ජී. එස්. බී . රානි පෙරේරා ගායනා කල මේ ශෝකී ගීතය මෙතනින් අහන්න . ..

. . . . . . . . . . .

පියා සලන ඉගිල්ලී . ..

පියා සලන ඉගිල්ලී . . . //
රත්තරනේ . . .
පියා සලන ඉගිල්ලී
රත්තරනේ . . .
ඔබයි සුසුදු පරෙවි කිරිල්ලී . . . ..
පියා සලන ඉගිල්ලී
රත්තරනේ . . .
ඔබයි සුසුදු පරෙවි කිරිල්ලී . . . ..
පියා සලන ඉගිල්ලී . . ..

සිනා හලන වෙලාවේ . . රත්තරනේ
සිත පිබිදෙයි සඳසේ වලාවේ . . .//
නෙතේ කඳුලු පෙනීලා . .
මාස්ටර් . . මාස්ටර් . .
රත්තරනේ . .
ලේ වැගිරෙයි හද පෑරීලා .. .

ඔබේ වත මැලවිලා නම්
රත්තරනේ .. මගේ දුක වාවමිද කෙසේ මම් . . .//
ආ . . .
ඔබේ වත මැලවිලා නම්
රත්තරනේ .. මගේ දුක වාවමිද කෙසේ මම් . .
ඇදී සුරත ගනිද්දී . . රත්තරනේ මා මත්වේ මිහිර පිරෙද්දී . . .


මේ ගීතය ගැන නම් මා අතින් වෙන කිසියම් දෙයක් නොලියවෙන තරම් . . . එපමනටම මේ ගීතයට අදාල චිත්‍රපටියේ රූප රාමු මේ ගීතයේ අන්තර්ගතය පවා ගිලගෙන කියා මා කීවොත් මේ රූප රාමු නරඹා ඇති කෙනෙක් මා නම් සමඟ එකඟ නොවේද . . . ?

චිත්‍රපටිය : අල්ලපු ගෙදර
නළු නිළියෝ : හි‍යුගෝ මාස්ටර්, ජෝ අබේවික්‍රම සහ සුරූපී නිළි කැලැරිස් ද සිල්වා.

(මේ චිත්‍රපටිය සිනමා ශාලාවේ නරඹන්න මා රැගෙන යද්දී දෙමාපියන් කියන හැටියට මට වයස අවුරුදු 2ක් හෝ 3ක් පමන ඇතිලු . . . නමුත් පසුකාලීනව මේ ගීතය හැර සිනමා පටිය මා නරඹා නැති බව පමනක් මා දනිමි . . )

තට්ටු නිවාස ගොඩනැගිල්ලක උඩුමහලක හියුගෝ මාස්ටර්, ජෝ කාරයා (අපේ අම්මා ඔහුව හඳුන්වන නම )සහ තවත් මිතුරන් නවාතැන් ගෙන සිටී . . .

ඔවුන්ගේ සැඳැල්ලෙන් පෙනෙන අල්ලපු ගෙදර නිවසේ හිංදි නිළියන් පරදවන සුරූපී රූ සපුවක් හිමි තරුණියක් වාසය කරයි . . . මෙහා ගෙදර සියළුම තරුණයන් ඈට උමතුවෙන් මෙන් පෙම් කරනු ලබයි . . .

කෙසේ නමුත් සංගීත හැකියාව නිසාම ඇයට සංගීතය ඉගැන්වීම සඳහා හියුගෝ මාස්ටර් මේ තරුණියට ලංවීමට ඉඩ ප්‍රස්ථාලබා ගනී . . .

මේ ගීතය උගන්වමින් සිටින අතරතුර "රත්තරනේ . . " කියමින් තරුණියගේ නිකටින් අල්ලමින් සිටියදී මෙහා ගෙදර සැඳැල්ලේ සිට ජෝ කාරයා හියුගෝ මාස්ටර් ට "බූරුවා. . මී හරකා . .. කැරපොත්තා. . . ගැඩවිලා . . යනදී වචනයෙන් බැනවදිමින් එහාට මෙහාට ගමන් කරන දර්ශනය මේ ගීතය අසන හැම මොහොතකම මැවී පෙනී සිනා උතුරා යන බැවින් ඉන් එහාට දෙයක් සිතීමට වත් මට නම් ඉඩක් නොලැබේ . ..

මේ අපූරු ගීතය ගායන කරනෙන මුත්තුසාමි මාස්ටර් සමඟ සුජාතා අත්තනායක. මේ ගීතය මෙන්න මෙතනින් අසන්න

. . . . . . . . . . . . . . . . . . . .

සෙස්ස පස්සට . . .මේ ලිපියේ ඉතුරු කොටස මතුවට ලියන්න සිතාගෙන සිටිමි . ..

Thursday, January 7, 2010

අන්තිම කැමැත්ත සහ මිනීමැරුම . . . !





එලිනෝර් කාලයිල් මෝෆීන් විස මුසු සැන්විච් කෑමට දී මේරි ජෙරාඩ්ව මැරුවාද . . .?

එලිනෝර් කාලයිල් නමට ලැබුනු නිර්නාමික ලිපිය එව්වේ කවුද . . . . ? එහි ලියා තිබුනේ මොනවාද . . ?

අංශබාගය රෝගය වැලඳී නැගිට ගැනීමට නොහැකිව සිටි ලෝරා වෙල්මන් මහත්මිය අන්තිම කැමැත්ත ලිවීම සඳහා නීතිඥයා කැඳවා තිබියදී ඊට පෙර දින මිය ගියේ සාමන්‍ය ලෙසද . . .?? මෝෆීන් ශරීර ගත වීමෙන්ද . . ??

හොප්කින්ස් හෙදියගේ අත්බෑගයේ තිබූ මෝෆීන් අඩංගු ටියුබය සොරා ගත්තේ කවුරුන් විසින්ද . . ?

අන්තිම කැමැති පත්‍රයක් නොලියා ලෝරා වෙල්මන් මහත්මිය මියගියහොත් ඇගේ විශාල බූදලයට එකම හිමිකාරිය තමා බව දන්නා එලිනෝර් කාලයිල් ඇගේ නැන්දනියට මරණාය හිමිකර දුන්නාද. . . ?

මේරි ජෙරාඩ් ජර්මනියේදී ලැබූ ඉහල ඉගෙනුම හේතුවෙන් ඈ තමා පිටුදකිනාවායැයි සිතූ ටෙඩ් බිග්ලන්ඩ් විසින් මේරි ජෙරාඩ්ව මරණයට පත්කලාද. . . ?

සැන්විච් වලට මෝෆීන් වස එක් කල මිනී මරුවාගේ ඉලක්කය මේරි ජෙරාඩ්ද . . . ? එලිනෝර් කාලයිල්ද . . ?

තමා සමඟ විවාහ ගිවිසගෙන සිටි තමා උමතුවෙන් මෙන් ප්‍රේම කරන රොඩ්‍රික් වෙල්මන්, මේරි ජෙරාඩ් කෙරෙහි උමතු ලෙස ප්‍රේමයෙන් බැදුනු බව දුටු එලිනෝර් කාලයිල් මේරි ජෙරාඩ්ව ඉවරයක් කිරීමට සිතුවාද. . . ?

හොප්කින්ස් හෙදිය භාජන සෝදද්දී මුහුන රෝස පැහැ වූයේ මුරගේ අසල ඇති රෝස ගහේ කටුවත් අතේ ඇනුනු බැවින්ද . . ?

රොඩ්‍රික් වෙල්මන් කිසිවෙකු නොමැති අවස්ථාවේ ලෝරා නැන්දාගේ කාමරයට රිංගුවේ ඇයි . . .?

මේරි ජෙරාඩ්ගේ මරණය දා හන්ටර්බරි නිවස අසල නවතා තිබූ කාරය දොස්තර පීටර් ලෝඩ් ගේ එකමද . . ?

බිෂොප් මහත්මියගේ මේරි ජෙරාඩ් කෙරෙහි ඇති අකමැත්තත් ඇගේ මරණයත් අතර යම් කිසි සම්බන්ධතාවයක් ඇත්ද . . . ???

නිර්නාමික ලිපිය ලීවේ ඕබ්‍රියන් හෙදියද . . ?

යලි ගොඩ ගන්න නියම කල ලෝරා වෙල්මන් මහත්මියගේ මිනියේ මෝෆීන් අඩංගු බව රජයේ රසපරීක්ෂක සොයා ගනීද . . . ?

ඇගේ මරනයට හේතුව මෝෆීන් බව දොස්තර පීටර් ලෝඩ් දැන සිටියාද . . ?

රහස් පරීක්ෂක හර්කියුල් පයිරට්ට මේ අභිරහස විසදීමට හැකිවෙයිද . . . ?

. . . .. . . .. . . .. .

මේ සියළුම ප්‍රශ්න වලට විසඳුම් අවශ්‍යනම් ඔබට අගතා ක්‍රිස්ටි ලියූ "Sad Cypress" පොත හෝ පූජිත කරුනාරත්න විසින් පරිවර්ථනය කල "අන්තිම කැමැත්ත" පොත බලන්නම වෙනවා . . . .

ෂර්ලොක් හෝම්ස් රහස්පරීක්ෂක කතා වලට වහවැටී සිටි මට මේ පොත ෂර්ලොක් හෝම්ස්ගේ කතා තරම්ම රසවත් බව වැටහුනේ මේ දිනවල තිබූ කාර්‍‍යබහුලත්වයත් අමතක කොට මුලින් රාත්‍රී ආහාරය සමඟ අනුපාන වශයෙන් කියවා පසුව එක හුස්මට කියවා අවසන් කල පසුවයි . . .

නිවාඩුව නිමාවී එන හැම වාරයකම මට මගේ "ටේස්ට් එකට" හරියන වර්ගයේ පොතක් තෑගි කරන දයාබර ලළන්ත මල්ලීට ස්තූති වෙන්න මේ අගනා පොත මට දැනට සති තුනකට පමන පෙර ලැබුනා වුවත් කියවා අවසන් වූයේ පෙරේදා රාත්‍රියේයි . . .

ඉතිං මෙපමන අගනා පොතක් ගැන ඔබ සමඟ බෙදා හදා ගන්න තවත් පමා වෙන්නේ ඇයි කියා සිතූ මා වැඩ රාජකාරී මැද මේ පෝස්ට් එක නිමා කලා . . . .

Monday, January 4, 2010

අපේ සම්පත් සහෝදරයාට . . ජය වේවා. . . !



මම ඊයේ ලිපියේ සඳහන් කල දේශපාලන උණ හැදුනු දවස්වලම . . . ඒ උණ, නිකං උණක් නොවී . .. උණ සන්නිපාතයක් වෙන්න කරුණක් සිදුවුනා.

ඒ තමයි අපේ ගමේ ජනප්‍රියම චරිතයක් වූ "සම්පත්" අන්වර්ථ නාමයක් පමනි. ඒ පුද්ගලයා අදටත් ක්‍රියාශීලී දේශපාලනයේ නියැලෙන්නෙක් බැවින් ඔහුගේ නමේ තේරුමට සමාන තේරුමක් ඇති මේ නම යොදා ගතිමි) අපේ පක්ෂයෙන්ම දේශපාලනයට පිවිසීම.

ගමේ තරුණ සමිතියේ සභාපති, අනෙක් සමිති සමාගම් වල ක්‍රියාකාරී සාමාජිකයෙකු - නිලධාරියෙකු පමනක් නොව අපේ පාසැලේ හිටපු දීප්තිමත්ම ප්‍රධාන ශිෂ්‍ය නායකයෙකු, ආදිශිෂ්‍යයෙක් වූ ඔහුට සහයෝගය දක්වන්නට පාඩම් වැඩ පවා අතපසු කර ගන්න මා දෙපාරක් නොසිතූ තරම්.

සාමාන්‍ය පුද්ගලයෙකුගේ දේශපාලනයේ ආගමනය සිදු වන්නේ ප්‍රදේශීය සභාවෙන් කීවොත් මා නිවරදියි මා සිතන්නේ . . .

කොට කලිසමකුත් රතුපාට ටී ෂර්ට් එකකිනුත් සැරසී පුංචි එකෙකුට ඔසවා ගත නොහැකි තරම් වූ රතු කොඩියකුත් වනමින් . . . උගුර ලේ රහ වෙනතුරු “අපේ සම්පත් සහෝදරයාට . . ජය වේවා. . . !” කියා කෑගසමින් . . . ගමේ ගෙයක් ගෙයක් ගානේ ඔහු හා සහ පිරිවර සමඟ කැන්වසින් ගිය . . . පුංචි එකෙකුට "අපේ පක්ෂේ අයියෙක්" . . "අපේ ගමේ අයියෙක්" . . ."අපේ පාසැලේ ආදිසිසුවෙක්" . . ."අපේ යෞවන සමිතියේ අයියෙක්" ප්‍රාදේශීය සභාවට යවන්න උවමනා වෙන්න ඇත්තේ . . . ඔහුට සහයෝගය දැක්වූ අනිත් අයට තිබූ අවැසිතාවයන් වූ . . . අලි නාවන තරම් ලොකු වලවල් තිබූ ගමේ පාරට තාර ටිකක් දාගන්න . . . පාර දෙපස ජීවත් වූ අය පාරෙනුත් අල්ලා වැටවල් තාප්ප ගසා ඇති නිසා වැස්ස දාට වතුර බහින්න කානු නැති කමින් පාර දිගේ ගලා යන වැසිදිය නියමාකාරයෙන් ගලා යන්න කානු පද්දතියක් සකස් කරගන්න . . . . හංදියේ සිට ගමේ පාර දිගේ කිලෝ මීටරයක් දෙකක් පයින් යන්න තියෙන දුර බසයකින් ගමන් කිරීමට ගමට බස් සේවාවක් ලබා ගන්න . .. . ලිං වලින් වතුර අදින්න තිබෙන කම්මැලි කමට ගමට නළ ජලය ලබා ගන්න . . . වගේ කරුනු වුවත් අර පුංචි එකාට තියෙන්න ඇත්තේ "අපේ එකෙක්" කියන හැඟීම විතරක් වෙන්න ඇති. . . !

මන්ත්‍රී කමකට තරඟ කරපු "සම්පත් අයියා" ප්‍රදේශයෙන් වැඩිම මනාප ලබාගෙන ප්‍රාදේශීය සභාවේ සභාපති වුනාට පස්සේ . . . ඡන්දයට කලින් මෙන් සුපුරුදු පරිදි "සිරි අයියේ කොහොමද" කියාගෙන තාත්තා එක්ක කතාබහට ගෙදරට ගොඩ නොවුනත් . . .. පන්සලේදී අහම්බෙන් හරි දැක්කාම හිනාවකින් විතරක් සංග්‍රහ කරලා අහක බැලුවත් . . . අඩු නොවුනු ඔහු ගැන තිබූ "අපේ" කියන හැඟීම දිය වෙන්න පටන් ගත්තේ අනිත් අය බලාපොරොත්තු වූ කිසිම සේවාවක් ගමට ඔහුගෙන් ඉටු නොවුනාටමත් වැඩිය ඔහු පගාව හෙවත් "ජරාව" කනවා කියලා ඒ පොඩි එකාගේ කනට අහන්න ලැබුනු පසුවයි.

යෞවන වියෙන් තරුණ වියට පා නැගූ අර පුංචි එකා පෙලෙන්න ඇත්තේ "සම්පත් අයියා" ගැන තරහකින් නොවෙයි . . . මේ වගේ එකෙක් වෙනුවෙන් ඇයි මම දරදිය ඇද්දේ කියල උපන් තමන් ගැනම තරහකින් . . .

"පුතාලා හැම දෙනාම සම්පත් අයියාට උදව් කරන්න" කියලා කියපු . . . මුලින්ම සම්පත් අයියාට ගුරුහරුකම් දුන්නු . . . පුංචි එකාගේ ලෝකේ වීරවරියක් වූ . . . ඔහුගේ පාසැලේ රාජපක්ෂ ගුරු මෑණියෝ පෙලෙන්න ඇත්තෙත් ඒ වගේම තරහකින් වෙන්න ඇති කියලා අර පුංචි එකාට හිතෙන්න ඇති. . . . !

මනසින් නොව වයසින් පමනක් තරුණ වියෙන් පියමං කරමින් සිටින එදා සිටි පුංචි එකා අහම්බයකින් බ්ලොග් කරුවෙක් වී "වැරදි කරන ඕනෑම කෙනෙකුට තමන්ට ඒ වැරදි කිරීමට සාධාරන හේතු තියෙනවා" කියා සිතමින් සිටින . . . හැම දෙයක් දෙසම උපේක්ෂාවෙන් බලන්න උත්සාහ කරමින් සිටින . . . . කොටින්ම අලුත්ම ඇසකින් ලෝකය දකින්න උත්සාහ කරමින් සිටින . . . ඒ එදා පොඩි එකෙක් වූ එකාට අනාගතයේ බිහිවන "සම්පත් අයියලා" ජරා කාක්කන් නොවී යහපත් නායකයින් වීම සඳහා , කිරීම සඳහා . . .උගුර ලේ රහ වෙන තුරු කෑගසන, කැන්වසින් යන, දරදිය අදින, කඩේ යන, කතිරය ගසන, පසුව දෙමාපියන් සිහිකරමින් බලු බැනුම් බනින . . . අපිම පිලිපැදිය යුතු කරුනු කීපයක් මෙසේ පල ගස්වන වගයි . . .

1 වෙනි කරුණ . . . .

සද්දෙන් පඩයක් ගියත් ඒකත් උත්සවයකට හේතුවක් කරගෙන ඒ උත්සවයේ ආරාධිත අමුත්තා ලෙසට මන්ත්‍රීතුමා, මන්ත්‍රී තුමෙක් හෝ ඇමතියෙක් ගෙන්වන අපේම පුරුද්ද අපි අත්හරිමු . . . .

අපි හැමෝම කැමතියි අපිට දේශපාලන බලවතුන් සමඟ හිතවත්කම් තිබෙන බවක් ලෝකෙට පෙන්වන්න (හදවතට පොඩිත්තක් තට්ටු කර අසා බලන්න )

ඉතාම ස්වභාවික සංසිද්ධියක් වූ ගැහැනු දරුවෙකු මල්වර වීම පවා අපේ බොහෝ අය මේ බලවතුන් සමඟ ෆිට් බව පෙන්වන්න අවස්තාවක් කරගනු ලබනවා. මල්වර වූ දැරිවිය කෙතරම් අපහසුවට පත්වූවත් ඒ ගැන නොසලකා විශාල උත්සවයක් සංවිධානය කර එහි ප්‍රධාන අමුත්තා ලෙස ආරාධනා කරන්නේ මන්ත්‍රී තුමාටයි.

විවාහ උත්සවයදී අපේ පැත්තෙන් සාක්ෂියට අත්සන් තබන්නා මන්ත්‍රී වරයෙක් හෝ ඇමතියෙක් නම් අනිත් පැත්තේ අයට අපේ "ලොකු කම" පෙන්වන්න එය හොඳම අවස්ථාවක් ලෙස නොසිතන දෙමාපියන්, වැඩිහිටියන් නොවේද අපට සිටින්නේ. . . ?

ඒ තබා වෙසක් එකට පුංචි කැරකෙන කූඩුවක් හැදුවත් ඒක විවෘත කරන්න මන්ත්‍රී තුමාටම කියන්න ඕනෙයි කියන මානසිකත්වයක් නෙමෙයිද අපිට තියෙන්නේ . . . ?

මන්ත්‍රී වරයාගේ පැත්තෙන් මේ එක් අවස්ථාවකට අඩුම තරමින් රුපියල් 5,000ක් වත් නොදුන්නොත් ඔහුගේ තත්වයට මදිකමක් කියා ඔහුට නොසිතෙයිද . . ? ඔහුගේ මාසික වැටුප රුපියල් 50,000ක් කියා අනුමාන කලොත් එක් උත්සවයකට ඔහුට ඔහුගේ වැටුපෙන් 1/10ක් පරිත්‍යාග කරන්න සිදුවන අතර (ඔහු ඔබේ පමනක් නොව ගමේම මන්ත්‍රී වරයා නිසා) එක් මාසයකට එවැනි උත්සව 10කට ආරාධනා ලැබුනොත් ඔහුගේ සම්පූර්න වැටුපම අනුන්ට පුදන්න වෙනවා නොවේද . . ??

අනෙක් අතර ඔහු ඊට වඩා අඩු මුදලක් පරිත්‍යාග කලොත් "අයියෝ . . අරූට කිව්වට වැඩිය හොඳයි පාරෙ යන බල්ලෙක්ට කිව්ව නම් . . . පැජරෝ එකෙන් ඇවිල්ල කට්ටියම කාලා බීලා දීල ගියේ රුපියල් 1,000 යිනේ බං" කියා අපිම නොකියයිද . . ?

හිතලා බලන්න . . ඔහුට ජරාව කනවා ඇර වෙන විකල්පයක් අපි ඉතුරු කලාද . . . ??? ජරාව කන එක ගැන ඇත්තෙන්ම වැරදිකරුවා ඔහුද . . ??

තමන්ගේ මල්වර උත්සවයට, මගුලට අත්සන් කරන්න, වෙසක් කූඩුව විවෘත කරන්න මන්ත්‍රීවරු ඕන නෑ කියන්න තරම් හයියක් මල්වර වූ දියනියට, විවාහ වන තරුණ පුතුට - දියණියට, වෙසක් කූඩු හදන මිතුරෝ කන්ඩායමේ සාමාජිකයාට තිබේ නම් ජරාව කන "සම්පත් අයියෙක්" නිර්මාණය කිරීමට මම දායක නොවුනිමි කියා ඔබට ආඩම්බරයෙන් පැවසිය හැකි නොවේද . . . ?

Sunday, January 3, 2010

ශ්‍රී ලාංකික දේශපාලනය නම් මඩ ගොහොරුවේ නෙළුමක් පිපෙන්නට නම් . . .!!



මට ගොඩාක් පුංචි කාලේ ඉඳන්ම දේශපාලන උනක් තිබුනා . . . ඒ උන හැදෙන්නයි . . වැඩි වෙන්නයි හේතු අපේ ගෙදර පරිසරයෙන්ම ලැබුනා කිව්වොත් නිවරදියි . . . අපේ තාත්තා එකල එතරම්ම විශාල නැතත් විශාල පිලිගැනීමක් තිබූ වාමාංශික පක්ෂයක "හොඳ කකුලක්"

පාසැලට අවශ්‍ය අමතර පොතක් ගන්න රුපියල් සීයක් ඉල්ලගන්න ඕන වුනොත් ඒ සීය ගන්න කාරනා සීයක් ඉදිරිපත් කරල නහයෙන් අඬල අඬල ඉල්ල ගන්න සිදුවෙද්දී පක්ෂ අරමුදලට ආධාර වශයෙන් රුපියල් දහදාහේ ඒවා පරිත්‍යාග කරලා තියෙනවා කියලා අම්මා ඇඳුම් සෝදද්දී තාත්තාගේ කමිස වල තිබිලා අහුවුනු රිසිප්ට් වලින් දැක්ක දවසේ ඉඳලා තාත්තගේ වාමාංශික දේශපාලනය මොන වගේ එකක්ද කියලා මම හිතලා බැලුවත් එයා එක්ක වාද කලත් මට තාම හරියටම එයාගේ දේශපාලන දර්ශනය නම් මීටර් වෙලා නෑ . . .

හැබැයි අපේ තාත්තා දේශපාලනෙන් පුද්ගලික වාසි නම් බලාපොරොත්තු වුනේ නැති බව මම හොඳාකාරවම දන්නවා . . . ඒත් මම ඉස්සර තාත්තා එක්ක වාද කරනවා දරුවන්ට උවමනාවකට සල්ලි නොදී පක්ෂ අරමුදලට ලොකු කුට්ටි දෙන දේශපාලනේට කියන නම සමාජවාදය නෙමෙයි "ලෝකෙට පරකාසේ ගෙදරට මරගාතේ වාදය" කියලා . . . ඒ වෙලාවට මාව කන්න වගේ බලං හිටියත් මම දන්නවා තාත්තා මට ගහන්නේ නෑ කියලා කවදාවත් . . . (ඒකනේ බය නැතුව ඒ වගේ දේවල් කිව්වේ)

අපේ ගෙදර ඉස්සර අක්කයි මමයි රුපියල රුපියල එකතු කරලා අරන් අපේ වත්ත පුරාම හිටෝපු මල් පාත්ති තලලා පොඩි කරලා දාපු රැස්වීම් ලොකු මිදුලකුයි පඩි හතරක් පහක් නැගලා ගොඩ වෙන්න තිබුනු විවෘතත ස්ටේජ් එකක් වැනි අඩි පහලොවක් පමන පළල විස්සක් විතර දිග විවෘත ඉස්තෝප්පුවේ හැම මාසෙකටම පාරක් විතර තිබුනා.

මැයි පෙලපාලි දවස්වලට අපේ ගෙදර කෑම ඉව්වේ කල්දේරම් වල . . . රැස්වීම් දවස්වලට සරුවත් හැදුවේ ලොකු ප්ලාස්ටික් බැරල් වල . . . ඔතපු කෑම පාර්සල් පෙට්ටි වල අසුරන එක . . . රැස්වීම වලට ආපු අයට ට්‍රේ වල තියාගෙන ගිහින් සරුවත් පිලිගන්වන එක අපිට (නංගිටයි මටයී හරිම ජොලි වැඩක් වුනා . . .

තාත්තා ගෙදරදී යාලුවොත් එක්ක එකතු වෙලා අඩියක් ගහන ගමන් කතාකරපු එන් එම් සහෝදරයා, සිරිමා මැතිනිනිය, ෆීලික්ස් ඩයස් බන්ඩාරනායක, ඉන්දිරා ගාන්ධි, සුභාෂ් චන්ද්‍රබෝෂ්, එස්.ඩබ්.ආර්.ඩී. බන්ඩාරනායක, බොරළුගොඩ රාළහාමි, පිලිප් සහෝදරයා, විවියන් සහෝදරී, ඩී.එස්. සේනානායක, රොබට් ගුනවර්ධන, ශ්‍රී නේරු, වගේ අය ගැන මම අහගෙන හිටියේ එක්කෝ තාත්තගේ සරමේ ඔන්චිල්ලා පැද පැද . . නැතිනම් ඔඩොක්කුවේ ඉඳගෙන . . .

ඔය හේතු ඔක්කෝම මට අර කලින් කිව්ව දේශපාලන උන හැදෙන්නත් . . වැඩි වෙන්නත් හේතු වෙන්න ඇති . . .

ටිකක් විතර කාරනා කාරනා තේරෙන කාලෙදි මට හිතෙන්න ගත්තා "අත කැපුවත් අපේ තියෙන්නේ නිල් පාට ලේ" කියලා කියපු ආච්චිගේ දුව වෙච්චි ඒ ජාතියෙම කතා කියූ අපේ අම්මත් කීකරු බිරිඳක් වගේ තාත්තගේ දේශපාලනේට සහයෝගය දෙනවා වුනත් . . තාත්තා මේ පක්ෂේ හොඳ කකුලක් නිසා මාත් මේ පක්ෂේ හෙංචයියෙක් වෙන්නේ ඇයි කියලා. . . මේක මේ කියන තරම් හොඳ එකක්ද කියලා හොයලා බලන්න ඕන කියලා . . .

කොහොමින් හරි ගෙදර තිබුනු දේශපාලන පරිසරයත් එක්ක අනිත් ප්‍රධාන පක්ශ වල ප්‍රතිපත්ති ප්‍රකාශන හොයාගන්න එතරම් අමාරුවක් නොතිබුනායින් ඒ හැම එකම කියෙව්වා.

අවසානේට මගේ පොඩි මොලේට තේරුනා ඒ පක්ෂේ ප්‍රතිපත්ති අනිත් ඒවාට වඩා ප්‍රයෝගියකයි . . . කාලීනයි කියලා. ඉතින් මාත් එදා ඉඳන් ඒ පක්ෂේ සාමාජික ලැයිස්තුවට නොවැටුනු ඡන්ද බලය වත් නොතිබුනු පක්ෂ සාමාජිකයෙක්. පසු කාලයක අපේ පක්ෂය බලවත් පක්ෂයක නායිකාවකට සහයෝගය දෙන්න පක්ෂේ කොඳුනාරටිය කඩා ගත්තු දවසේ ඉඳන් එතකොට ඡන්දහිමි පුරවැසියෙක් වෙලා හිටි මම වැටුනේ පාවෙන ඡන්ද කියන ගොඩට.

මේ දැවස්වල ඇතිවෙලා තියෙන ඡන්ද උනුසුමත්; බුමුතුරුණු, ටැබූ සබ්ජෙක්ට්, බියෝන්ඩ් ෆ්‍රේම්, රාමචන්ද්‍රගේ අඩවිය, සත්දින, මෙම්බර් ඩොට් කොම්, පුලස්තිගේ සටහන වැනි දේශපාලන ලිපි අඩංගු බ්ලොග්ස් ත් බලල ඒ උන නිව්මෝනියාවක් දක්වා වර්ධනය වෙන්න කලින් දේශපාලනය ගැන මගේ අදහස් ටිකත් ලිපි පෙලකින් ලියන්න හිතුවා.

මගේ ජීවිතයේ මෑත කාලයේ සිදුවූ සිදුවීම් වලින් මාව අලුත්ම මිනිසෙක් කල කාරනා දෙකක් තියෙනවා. එකක් මගේ පුංචි පුතා "විරුල්" ("ඇයි මම" කියලා මගේ ගෙදර උන්දෑ ඔන්න වලි දානවා එහෙම නෙමෙයි හොඳේ - ඒකනේ මම කිව්වේ මෑත කාලයේ දේවල් වලින් කියලා) විරුල්ගේ සුරතල් දඟකාරකම් දකින අහන මම හැම දවසකම පුදුමාකාර සතුටක් ලබනවා. අනික මගේ බ්ලොග් එක . . .

මගේ බ්ලොග් එක මාව වෙනස්ම කෙනෙක් කලා කීවොත් නිවරදියි . . . මගේ බ්ලොග් එකත් මේ බ්ලොග් අවකාශෙත් මගේම අදහස් මටම විවේචනය කරලා බලන්න . . . හැමදෙයක්ම වෙනස් විදිහකට දකින්න මට තුන්වෙනි ඇසක් ලබා දුන්නා කියලයි මට හිතෙන්නේ.

මම මීට කලින් දේශපාලනේ ගැන කතාකරා නම් ක්‍රෝධයෙන්, ද්වේශයෙන්, කලකිරීමෙන් කතා කරන්න බොහෝවිට ඉඩ තිබුනා.

නමුත් කලින් සඳහන් කල තුන්වෙනි ඇසින් ලෝකය දකින්න ගත්තු මට අද ක්‍රෝධයෙන්, ද්වේශයෙන් තොරව දේශපාලනය ගැන කතාකරන්න හැකියාවක් ලැබිලා තියෙන නිසා මම හිතනවා මේක තමයි මගේ අදහස් මෝචනය කරන්න සුදුසුම අවස්තාව කියලා. .

එහෙනම් රැඳී ඉන්න දුකා සමඟ . . අපි කතා කරමු . . පහර ගහමු. . විවේචනය කරමු . . . විග්‍රහ කරමු . . . ඔය ඔක්කෝම කරලා ඉවර වෙලා පිලිපදින්න පුලුවන් කියල එකඟ වුනු දේවල් තුලින් හෙට දවසේ යහපාලනයක් ගැන අද දවසේ හීන දකිමින් හැමදාම හැමෝටම බැන බැන නොයිඳ, ශ්‍රී ලාංකිකපුරවැසියන් විදිහට මේ ලාංකික දේශපාලනය කියන මඩ ගොහොරුවේ නෙළුමක් පුබුදුවන්න අපිට කලහැකිදේ මොනවාද කියා සොයා බලා ක්‍රියාත්මක වෙමු.

මේ ලිපිත් කියවල බලන්න

Related Posts with Thumbnails